π—¨π—‘π—”π—‘π—š π—›π—¨π—šπ—‘π—” 𝗦𝗔 𝗔𝗬𝗨𝗗𝗔 π—‘π—œ 𝗑𝗔𝗑𝗔𝗬 π—‘π—˜π—‘π—˜ 𝗦𝗔 π—žπ—”π—•π—”π—₯π—”π—‘π—šπ—”π—¬π—”π—‘ π—œπ—£π—”π—›π—œπ—šπ—”π—¬π—’π—‘ 𝗦𝗔 𝗕𝗔π—₯π—”π—‘π—šπ—”π—¬ π—™π—œπ— π—”π—šπ—”π—¦, π—žπ—”π—§π—œπ—£π—¨π—‘π—”π—‘

Aron hingpit nga mapaabot ngadto sa hilit nga kabarangayan ang serbisyo ug programa sa kagamhanang probinsyal, ipahigayon ang unang hugna sa Ayuda ni Nanay Nene sa Kabarangayan didto sa Barangay Fimagas, lungsod sa Katipunan ning lalawigan karong Setyembre 2-3.

Kini ang gibutyag ni Atty Ivan Patrick Ang, ang Coordinator sa maong programa. Lakip sa serbisyo nga itunol sa Barangay Fimagas ug sa kasikbit nga mga barangay, mao ang libreng legal assistance pinaagi sa Provincial Legal Office, sports clinic, sports tournament, talent workshop pinaagi sa Provincial Governor’s Office.

Tree planting pinaagi sa Provincial Environment and Management Office (PEMO) diin gi-target nga makapananum ug usa ka milyon ka kahoy sulod unya sa 9 ka tuig nga pagdumala ni Nanay Nene, matud pa ni Atty Ang.

Si Atty Ang nagkanayon usab nga pagahimuon ang Little Hudyaka sa maong dapit aron hingpit kining mabibo, diin adunay banda ang pagadad-on didto.

Anaa usab ang Provincial Social Welfare and Development Office (PSWDO) pinaagi ni PSWD Officer Dr. Jose Mante kinsa motunol sa tag lima ka kilo nga bugas, uban sa sardinas, noodles, corned beef ug uban pang delata ngadto sa 700 ka katawhan.

Manghatag usab sila ug biscuits nga anaa sa lata, sungkod ug gatas delata alang sa mga Senior Citizen ug Person with Disabilities (PWD).



Magpahigayon usab ang maong buhatan sa feeding program diin ang ipakaon mao ang champorado nga adunay gatas, ngadto sa 700 ka bata ug mga dagko.

Si Dr. Mante ang namahayag usab nga magpahigayon sila ug nutrition education sanglit taas ang kaso sa malnutisyon sa maong barangay.

Adunay used clothing ang ipanghatag usab nga nagagikan sa mga kawani ug opisyales sa kapitolyo.

Facebook Comments