#1 drug personality sa Malalag, Davao del Sur sikop

Davao City – Alas 10:15 sa buntag Biyernes gikasa sa Philippine Drug Enforcement Agency XI uban ang Digos City Police Station ang buy-bust operation didto sa Sitio Sto. Tomas, Barangay Igpit, Digos City, Davao del Sur.

Ang target sa maong operasyon ang Number 1 drug personality sa Municipal Target List sa Malalag, Davao del Sur nga si Anecito Sibay, 34 anyos.

Malampusong nasikop ang suspetsado atol sa pagtunol niini sa usa ka pakete sa shabu ngadto sa poseur buyer sa mga operatiba sa kantidad nga P500.00.


Dali kining giposasan og nakuha usab sa posisyon niini ang tulo ka gramos nga shabu nga adunay street value nga P45,000, disposable lighter, buy-bust marked money, XRM motorcycle nga walay plate number nga maoy ginagamit niini sa pagpayuhot og iligal nga droga.

Sumala sa PDEA XI nga priso na ang suspek sa Digos City Police Station detention facility samtang ang mga nakumpiskang iligal nga mga droga gisumite na ngadto sa Laboratory Service sa PDEA para sa laboratory examination.

Ang suspek pasakaan og kasong may kalapasan sa Sections 5, 11 ug 12 sa Article II sa Republic Act 9165 o Comprehensive Dangerous Drugs Act of 2002.

RadyoMaN Aimee Guinita

Facebook Comments