General Santos City – nagpabiling anaa sa kustudiya sa CIDG-12 ang 16 ka mga babaye nga una nang narescue sa usa ka KTV bar nga nahimutang sa national highway, Brgy Lagao, Gensan.
Alas 11:00 ang takna sa gabie dihang gironda sa kapulisan ang Cowgirl Bikini and KTV Bar gumikan sa ilang nadawat nga report nga matud pa gasayaw nga hubo ang ilang mga babaye pag abot sa tungang gabie.
Atol sa pag sulod sa kapulisan ila pang naabtan ang usa ka babaye nga way sapot samtang nag sayaw-sayaw ibabaw sa stage. Tungod niini girescue ang nahisgutan uban ang mga kaubanan niini. Samtang apil nga gidala sa kapulisan ang gikaingong handler sa maong mga babaye ingon man ang koreanong tag-iya niini nga mao si Seok Choi.
Sumala ni SPO1 Pablo Jugos, special operation unit sa CIDG-12, nga dugay na nilang gipanid-an ang operasyon sa nasangpit nga KTV bar gumikan na usab sa mga reklamo nga ginapahubo ug ginapasayaw ang ilang mga trabahanteng babaye.
Sa karon giandam na sa CIDG-12 ang pagpasang-at ug kaso batok sa koreano ingon man ang kaubanan niini. Samtang posibling makasuhan ang babayeng naabtan sa kapulisan nga nagsayaw nga hubo ibabaw sa stage.
