Dos miembro del un criminal gang na Zamboanga de Norte ya sale muerto durante el fuerte encuentro entre el tropa del govierno, del Martes aga.
El portavoz del Polisiya Regional si Chief Insp. Helen Galvez ya nombra con el dos quien ya sale muerto como canda Usni Antao Lumingis alias Ato y si Alih Antao Lumingis maga siguidores di Jamilon Tukalan, ambos tiene el pendiente mandamiento de aresto na caso de murder.
Fuera con canda Lumingis, tres otro maga miembro del grupo nombrao como canda Sammy Lumingis Tungkal, Hatta Yacob Angsa and Attang Sabudin.
Asegun con Galvez banda alas 9:30 del aga el tropa del pulis y militar ya conduci el que se llama law enforcement operation na lindero del Siocon, na Zamboanga del Norte cuando ya man encuentro sila con el grupo quien armao de alta calibre armas de fuego.
El encuentro ya alcansa 15 minuto donde ya resulta na muerte del dos y el aresto del tres compañero.
El tropa del govierno ya recobri tres calibre 45 pistola y un calibre 22 rifle na lugar del encuentro.
