2 ka mga award nasungkit sang La Castellana, alkalde nominado bilang Most Outstanding Mayor sa 2019

LA CASTELLANA – Ginhatagan sang award bilang Most Child Friendly Local government unit ang banwa sang La Castellana sang Department of Interior and Local Government, kahapon Nobyembre 9 sa syudad sang IloIlo.

Ginpahayag ni Mayor Rhumyla Mangilimutan nga ang award nabase sa ginpatigayon nga survey sang DILG sang tuig 2017.

Paagi sini nakit-an nga ang La castellana amo ang may pinakanubo nga kaso sang child labor, may komprehensibo nga feeding program kag ginahatagan sang insakto nga pagtatap sang Rural Health Unit sang banwa ang ikaayong lawas sang mga kabataan.


Magluwas sini nakabaton man sang award ang La Castellana sadtong Oktobre bilang most improved local government unit kag may LODI award bangud sang implementasyon sang social pension para sa mga indigent nga senior citizen.

Suno sa alkalde nga ang mga senior citizen wala na nagapanaog sa banwa halin sa mga barangay agud magkuha sang social pension kundi sya na mismo ang nagapadulong sa ila tungod iya nakit-an ang kabudlayan para sa mga tigulang nga magdulhog pa tungod halos mga kabarangayan sang iya banwa ang yara sa nabukid nga bahin.

Sa karun liwat naman nga nangin nominado si Mayor Mangilimutan sang Super Brands International bilang Most Outstanding Mayor 2019.

Ang awarding sini sa Enero 23, 2019. Si Mangilimutan ang ginkabig man bilang Most Outstanding Mayor sang tuig 2018./Grace Supe

Facebook Comments