2 magsuon nalumos-patay sa Davao Oriental

23

Davao City – Dead on Arrival sa ospital ang duha ka magsuong babayi nga gitabang human nalumos sa dagat sa Barangay Cabasagan, Boston, Davao Oriental niadtong Martes (October 6, 2020).

Sa interbyu sa DXDC RMN Davao kang Jason Linaza, Police Non-Commissioned Officer (PNCO) sa Boston Municipal Police Station (MPS), gibutyag niini nga upat sila ka magsuon nga naligo sa dagat alas 8:00 sa buntag ug walay hamtong nga kauban.

Tungod sa dagkong balod, nadala niini ang 8-anyos nga biktima ug gisulayan pagluwas sa igsoon, apan nadala usab sa tubig diin nasayrang dili kabalo mulangoy ang nahisgutan.

“Upat sila managsuon (nga naligo). Tungod kay taas ang balod (sa dagat), nadala sa current si Rhea Mae (8-anyos). Then, si Roselyn (9-anyos), iyaha unta’ng luwason siguro pero naapil pud siya og ka-anod,” saysay ni Linaza.

Gilayong gi-respondehan sa medical team ang mga biktima ug daling gidala sa hospital apan gibawi-an na kini sa ilang kinabuhi.

Gibutyag ni Linaza, pagpanglabada ang trabaho sa ginikanan sa mga bata rason wala nabantayan ang nahisgutan.

Padayon ang ilang pahimangno labi na sa nagatrabahong ginikanan nga pabantayan og hamtong ang nahibiling menor de edad aron dili na masubli pa ang insidente.




RadyoMaN Kirby Manzon

Facebook Comments