2 patay kag 6 pilason, matapos bungguan sang Ford Ranger Pick-up ang ginasakyan nga topdown sa Tantangan, South Cotabato.

28

Duha patay kag anum ang pilason sa nagluntad nga disgrasya sa dalanon sa Purok Namnama, Brgy. Poblacion, Tantangan, South Cotabato, alas 6:30 kagab-i, Mayo 10, 2021. Imbolbado sa nasambit nga insidente ang isa ka unit sang Skygo Motorcycle nga may sidecar (V1) ginamaneho ni Moises Salvador Intendencia, 59-anyos, mangunguma kag residente sang Purok Aurora, Brgy. Poblacion, Tantangan, South Cotabato nga ginbawian sang kabuhi kag isa ka unit sang Ford Ranger Pick-up (V2), ginamaneho ni Rex Lemon Manuel Cablitas, 38-anyos kag residente sang Block 8, Guanzon Street, Suscano Subdivision, Brgy. Morales, Koronadal City, South Cotabato. Base sa ila suno kay SSgt. Client Asignacion, imbestigador sang Tantangan MPS, halin sa ila nga uma ang mga biktima nga nagasubay sa dalanon padulong sa Tacurong City ,apang pag-abot sa nasambit nga lugar aksidente nga nabungguan sang pick-up ang ila ginasakyan nga topdown, matapos nga nagpadulong sa ila dalan. Resulta ang driver sang topdown ang nakaangkon sang seryoso nga pilas sa mga nagkalain-lain nga parte sang iya nga lawas nga nangin tunaan sang iya hinali nga kamatayon, samtang ang iya mga miyembro sang pamilya nga ginkilala kanday Lolita C. Intendencia, 51 years old, Ivy C. Intendencia, 20 years old kag lima ka mga menor de edad ang nakaangkon man sang seryoso nga pilas sa mga nagkalain-lain nga parte sang ila nga lawas nga gilayon man nga gindala sa South Cotabato Provincial Hospital para sa nagakaigo nga medikasyon. Apang suno kay PSSgt. Asignacion,ginbawian man sang kabuhi kagab-i ang 8-anyos nga apo sang biktima. Samtang ang driver sang V2 ang luwas naman sa aksidente nga ginaaligar yara sa impluwensya sang makahulubog nga ilimnon. Ginkustodiya naman sa Tantangan MPS ang driver sang Ford Ranger Pick-up.


Facebook Comments