21 ANYOS NGA ILONGGA SA DUBAI, NALAGYO PAAGI SA PAGTAKLAS KAG PAGLUMPAT SA PADER

Report ni: Jennifer Debaja Palomo

Nakatigayon nga makapalagyo ang isa ka Ilongga 5 ka adlaw matapos nag abot sa Dubai paagi sa pagtaklas kag paglumpat sa pader sang agency nga nagbiktima sa iya sang illegal deployment.

Suno kay Gie, gin palakat siya bilang turista sa Dubai gamit ang kaugalingon nga dokumento apang sang gab-i antis ang iya flight, ginhimuan ini sa computer sang peke nga kopya sang pasaporte kag OEC sang ahente sa manila gamit ang ngalan sang iya pakaisa agud maggwa nga legal ang iya edad. Ginhambalan siya nga amo yadto ang gamiton pag abot sa Dubai.


Nakibot naman kag kinulbaan ang iya pakaisa nga empleyado sa munisipyo sa Sara sang mahibaluan ang modus sang ahente. Wala gid sila maghuna huna nga manugpeke ang ahente sa Manila kay siya ang ginsulat ni Gie nga mangin kontak person sa probinsiya.

Tungod wala sang ekspereyensiya tatlo lang kaadlaw nga nag obra si Gie sa nangin amo sini antis nagpangabay nga ibalik sa agency tungod indi na maka agwanta sang 4 ka kabataan sang amo nga puro pa magagmay.

Pag abot sa agency, nagpakitluoy ini nga papulion nalang apang ginsilingan siya nga bayaran niya ang gingasto nga balor P140,000 agud makapauli ini. Sa kahadlok nga ibaligya naman siya sa iban nga amo kag wala nalipod ang pagmaltrato sa mga pareho nga aplikante sa agency, napilitan ini nga malagyo paagi sa pagtaklas kag paglumpat sa pader.

Sa karon yara siya sa pag inakop sang isa man ka Ilongga nga natabuan mabuot ang amo kag ginsponsoran si Gie agud makaobra nga legal sa Dubai apisar ginapabayad sila sang P140,000 pesos kabaylo sang iya pasaporte.

Isa lang si Gie sa linibo libo nga nangin biktima sang illegal deployment o human trafficking.

Sa liwat gina paandaman ang tanan nga maghaling sa illegal recruiters. Siguraduhon nga legal ang inyo dokumento sa pag abroad agud malayo sa kapahamakan.

Say No to HUMAN TRAFFICKING.

Facebook Comments