General Santos City–Nagtingkagol sa selda sa Polomolok Municicpal Police Station ang usa ka 45 anyos, ulitawo, laborer nga nanimuyo sa Purok Mabuhay Brgy.Silway 7, Polomolok, South Cotabato nga si Ronnie Geguerro human nga iyang gitigbas ang biktimang si Nicolas Comenta 22 anyos, ulitawo ug nanimuyo usab sa susamang lugar.
Kahibaloan nga alas 10:00 ang takna sa gabie nakadawat ug tawag ang nasampit nga police station gikan sa Mdrrmc Rescue Team sa lugar nga dunay nahitabong pagpanigbas.
Gilayon usab girespondehan sa mga personahe sa Polomolok PNP ang maong lugar.
Atol sa ilang imbestigasyon nasayran nga ang biktima ug ang suspek a ng dugay nang may panagbingkil ug sa dihang aksidenteng nagkita ang duha sa usa ka tindahan pasado alas 8:30 sa gabie sa naasoyng lugar duna na usab nahitabong panaglalis nga maoy hinungdan nga misangko sa pagpanigbas ngadto na sa biktima gamit ang sundang nga miresulta sa pagkaigo niini sa iyang ulo.
Gilayon man usab gidala ang biktima sa iyang mga paryente ug sa mga miyembro sa BPATS ngadto na Polomolok Municipal Hospital apan pipila ka minuto gipabalhin kini sa iyang attending physician ngadto sa Provincial Hospital sa Koronadal City alang sa dugang medikasyon.
Sa karon ginahuwat pa sa kapulisan ang pamilya sa biktima alang sa pagpasang-at ug kaos batok sa suspetsado. (Reynald Timario)
