23-anyos nga lalaki arestado matapos magpakilala nga babae gamit ang peke nga FB account.

Arestado ang 23anyos nga lalaki matapos magpakilala nga babae gamit ang laragway sang isa ka babae sa Sitio Lugan, Barangay Poblacion, Lake Sebu, South Cotabato.
Ginkilala sang Lake Sebu MPS ang suspek kay Kuhmita Diamante Gonato, 23-anyos, housekeeper kag residente sang Sitio Lugan, Barangay Poblacion sa namensyunar nga lugar
Sa pagpangusisa sang kapulisan, naghimo sang peke nga FB account ang suspek kag nagpakilala nga babae gamit ang pangalan kag laragway nga Jessa Casiano Sinangote, 20anyos, dalaga kag residente sang Purok Rosas, Barangay Poblacion sa nasambit nga Banwa.
Sa dugang nga imbestigasyon, nag chat suno pa ang suspek sa biktima nga ginkilala kay Romel Cabra, 25anyos, labourer kga residente sang Sitio Tubong, Barangay Takunel sa nasambit nga Banwa sa diin nagpahayag suno pa ini sang mga matam-is nga tinaga.
Apang sang ulihi, amat-amat na ini panghulam sang kwarta sa biktima sang pipila ka beses kag nagpromisa nga bayaran kun mag abot kuno ang iya sweldo, bangud nagpakilala ini nga empleyado sang isa ka resort sa nasambit nga Banwa.
Sa dalayon nga pagpang-into sang suspek nagpangayo na sang bulig ang biktima sa awtoridad sa diin ginpatigayon ang entrapment operation.
Nagpain sang marked money nga P3500 ang pulis sa suspek nga ginkadakop naman sini.
Sa subong magapangatubang sang kaso nga pagbayolar sa RA 10175 ukon Cyber Crime Prevention Act of 2012 ang suspek nga nakapreso na sa Lake Sebu MPS.