248 ka mga pamilya apektado sang pre-emptive evacuation sa Lake Sebu, South Cotabato.

Nagalab-ot na sa 248 ka mga pamilya ang apektado sang pre-emptive evacuation sa Lake Sebu, South Cotabato.
Sa nasambit nga numero 118 ka mga pamilya halin sa tatlo ka mga sitios sang Brgy. Lamcade, Lake Sebu, South Cotabato ang ginpabakwit tungod sa ginakabalak-an nga “big landslide” tungod sa nakit-an nga tension cracks halin sa dalan sang crossing Sitio Bong padulong sa Takansad road Lamdalag Border.
Suno kay Lake Sebu Municipal Disaster Risk Reduction and Management Action Officer Roberto Bagong nagatinir ang mga bakwit sa ila nga mga himata kag may gindesignar man sila nga evacuation center kon wala sang istaran ang mga ini.
Samtang suno kay Bagong tigayon naman nga nakahatag sang ayuda ang local government unit, provincial government kag DSWD 12 sa mga residente nga apektado sang preemptive evacuation.
Ginkumpirmar man ni Bagong nga tubtob subong ginapatuman sa gihapon ang pre-emptive evacuation sa Brgy. Talisay nga yara sa 130 ka mga pamilya ang apektado tungod sa pagdaku sang tubig sa spring sang Merl Garden nga nagapadulong sa ila nga area.
Pahayag niya nga wala pa tubtob subong ginlift ang preemptive evacuation tungod magabase sila sa rekomendasyon sang Mines and Geosciences Bureau ukon MGB 12.
Samtang suno kay MDRRM Action Officer Bagong magapadayon sa Lunes nga adlaw ang assessment sang MGB 12 sa tension cracks sa nasambit nga lugar subong man para sa posible relocation site kag pagreroute sang dalan.


Facebook Comments