25 ka pamilya apektado sang demolition nagapangayo sang bulig sa syudad

81

BACOLOD CITY – Nagareklamo karon ang mga apektado nga pamilya sang 25 ka mga puluy-an nga yara sa idalum sang Lupit Bridge sa boundary sang Brgy. Singcang Airport kag Brgy. 40, Bacolod City nga ginpang-demolish sumugod sadtong Lunes bangud nga wala sila sang may masayluhan.

Suno sa representante sang amo nga pamilya nga si Tatay Romulo Quiatchon, halos tatlo ka dekada na sila nga naga-istar sa amo nga lugar apang sa karon, naga-sala sala sila kon diin magpadulong bangud nga gin-guba na ang ila balay apang wala man lamang sang lote nga ginhatag sa ila ang ciudad.

Ginpahayag ni Tatay Romulo nga handa sila nga mga pumuluyo nga magtuman sa notice to vacate nga ginhatag sang City Legal Office sang Bacolod kag magsunod sa proseso basta may ma-istaran gid lamang sila.

Apang suno sa iya, tuman ka damo sang mga dokumento nga ginahingyo ang ciudad sa pag-proseso para sa ila relocation sa Arao Property nga ginpangako sang ciuadad.

Sadtong Lunes, ginsuguran na sang CLO ang pagpangtaltal sang amo nga mga illegal structures nga gin-identify bilang danger zone kag base sa zonification sang ciudad indi ini residential area.

Ginpatigayon ang demolition sa 25 ka mga illegal settlers agud hatagan sang alagyan ang widening project sang Lupit Bridge.

Nahibaluan nga ini ang una pa lamang nga bahin sang demolition para sa pagpasangkad sang amo nga taytay nga nagsugod sadtong March 13 kag may completion date nga November, 2018.

Ang contractor sini amo ang Humming Bird Construction kag Supply and Wilkinson Construction JV sa balor nga P15.3 million pesos. /dyHB BACOLOD

Facebook Comments