Human sa libreng gipanghatag nga mga solar panel niaging tuig gikan sa Stiftung Solarenergie Foundation kung diin naka-benipisyo ang mga IP community sa Malungon og Kiamba, laing funding donor na usab karon ang mang-muntar og mga solar panel sa 2,500 kabuok panimalay sa Sarangani, partikularminte sa mga off-grid communities kadtong dili na maabot sa linya sa SOCOTECO II.
Segun ni Ms. Jelyn Apura, ang OIC provincial planning and development coordinator sa PPDO Sarangani, gipili sa European Union nga mahimong benipisyaryo ang Sarangani Province sa ilang programa gitawag nga SOLARES kon Strengthening Off-grid Lighting with Appropriate Renewable Energy Solutions. Sa entiro Rehiyon Dose, Sarangani og Sultan Kudarat lang ang benipisyaryo, dos mil kinintos (2,500) kabuok panimalay matag usa.
Ang magpatuman niini mao ang Mahintana Foundation katugbang ang PEF kon Peace and Equity Foundation sa pakig-alayon sa Dole Philippines og SOCOTECO II. May kinatibuk-ang pondo kini nga dul-an P300 Milyones ka pesos.
Ang maka-benipisyo nga panimalay ang makadawat sa ginatawag nga Solar Home System Unit kung diin unod niini ang usa ka (1) solar panel may electrical capacity nga 50 watt peak, battery, og system box nga makapa-andar nag transistor radio, telebisyon, lima ka LED bulb, makapa-charge pag celfone. Tagaan pa gyud og livelihood ang mga beneficiary.
Aminado si PPDO Apura nga lig-on ang partnership sa LGU-NGO-og pribadong sektor sa probinsya sa Sarangani maong dili na matud pa bag-o nga makadawat og mga programa og proyekto ang liderato ni Governor Steve Chiongbian Solon sa mga partner nga taga-gawas.
Gibutyag na lamang ni FABC President Board Member Kapitan Tatang Paras nga ila ng ginahan-ay karon ang mga dokyumento og uban pang rekositos aron makagamit na ang mga katawhan hilabi na ang mga kaigsoonang lumad og sa ilang mga estudyante nga naga-eskwela sa kabukiran.
Samtang, sa pikas nga bahin, gikumpirma ni TESDA Regional Director Rafael Abrogar nga mubarog na sa dili madugay ang world-class Regional Skills Training Center sa TESDA itukod sa Alabel. Anaa na matud pa sa DPWH ang pasiuna nga P45 Milyones ka pesos nga pondo aron masugdan na ang konstraksyon, sa pagpaningkamot ni Senador Manny Pacquiao kauban sila Congressman Ruel Pacquiao, Governor Solon, Sangguniang Panlalawigan, og ang LGU Alabel gipangunahan ni Mayor Vic Paul Salarda.
World-class ang maong pasilidad nga makita sa sulod ang admin building, assessment area, training hall, og ang dormitoryo kapuy-an sa mga buot mupailalum sa libreng TESDA skills training.
