Nagalab-ot sa 250 ka mga pamilya sa pito ka mga purok sang Brgy.New Iloilo, Tantangan, South Cotabato ang apektado sang pagbubo sang mabaskog nga ulan kag pagbaha kagab-i tungod sa pag-awas sang suba sa nasambit nga barangay.
Ini ang base sa ila inisyal nga datos suno kay Municipal Disaster Risk Reduction and Management Action Officer Michael Lester Tomanan.
Suno kay Tomanan temporaryo nga ginpabakwit kagab-i ang mga residente, apang gilayon man nagbalik ang pipila sa ila panimalay sang nagsubside ang tubig baha.
Ginkumpirmar ni Tomanan nga kagab-i naghatag sang pagkaon ang Philippine Red Cross South Cotabato Chapter, Local Government unit sang Tantangan kag naghatag man sang banig kag habol ang DSWD 12 sa mga bakwit, matapos nga nagcoordinate ang alkalde sa Regional Director.
Magluwas sa New Iloilo suno kay Tomanan, apektado man sang pagbaha ang lima ka mga pamilya sa Brgy. Libas.
Samtang subong nga adlaw magapadayon suno sa iya ang pagpanghatag nila sang relief goods nga halin sa DSWD 12 sa mga apektado nga mga residente sang pagbaha.
Apela niya naman sa mga residente sa Tantangan ilabi na sa mga barangay nga masami nga ginabaha sa tion nga may pagbubo sang mabaskog nga ulan nga mangin alerto kag magbakwit kon kinahanglan na.
