3 biktima sang 5-star gikan sa Bago kag Talisay

38

NEGROS OCCIDENTAL – Tatlo ka mga biktima sang palupok, 2 diri ang menor de edad ang gindala sa ospital sa magkatuhay nga insidente nga natabo kahapon sang hapon kag kagab-I sa ciudad sang Bago kag Talisay.

Sa ciudad sang Talisay, 2 ka mga kabataan nga naga-edad 8 ka tuig, residente sang Brgy. Zone 16, ang nabiktima sang palupok nga 5-star.

Suno sa iloy sang mga biktima nga may mga las 4 kahapon sang hapon sa ila man lamang balay, gina-uyatan sang mga biktima ang “umido” nga 5-star sang may isa ka lalaki nga naglabay kag nagabitbit sang lighter.

Nakibot sila sang hinali na lamang nga ginsindihan sang amo nga lalaki ang 5-star gani ini ang naglupok.

Ang isa ka bata may igo sa iya tudlo, middle kag kamalagku sa tuo nga kamot, samtang ang isa ka biktima ang may igo sa iya baba kag tiil.

Samtang, sa Bago City naman, isa ka soltero ang nalukpan man sang 5-star may mga las 7 kagab-i sa Brgy. Sampinit, ciudad sang Bago.

Nakilala ang biktima na si Reymark Magbanua, 22 anyos, residente sang amo nga lugar.

Ginsiling sang tatay sang biktima nga ginsidihan sang iya bata ang 5-star nga palupok apang nagpilit ini sa iya nga kamot kag naglupok resulta sang pagka-igo niya sa tuo nga palad kag sa iya tiyan.

Ang amo nga mga biktima ang gindala sa Corazon Locsin Montelibano Memorial Regional Hospital./dyHB BACOLOD

Facebook Comments