3 del 4 cautibo del ASG ya puede escapa

Tres del cuatro maga cautivo ZamboangueƱo construction worker quien ta resta na mano del Abu Sayyaf Group-Ajang-Ajang na Sulu el ya puede escapa enantes aga amediante el fuerte military operation.
El Task Force Sulu commander si Brig. Gen. Cirilito Sobejana ya confirma que canda Felimon Guerrero, Jayson Baylosis y Joel Adanza ya puede escapa desde na mano del diila maga cautor mientras si Edmond Ramos ta esta pa na poder del bandido grupo.
Conel tres ya escapa dayun ya saca el militar y ya dale el propio tratamiento na Sulu.
Acordando del Webes ya dale ultimatum el bandido grupo que asegun ay curta sila cabesa conel cuatro maga victima si gende ay dale diila demand ransom balor de 3 million de peso hasta alas 3 del tarde.
Pero nohay pursigui el diila amenaso porcausa ya queda estos bien ocupao para corre que corre libando conel cuatro cautibo amediante ta hace paspasan canila el maga soldao.
Conel unu ta resta cautibo ta precura pa el militar salva este maga momento mientras conel tres esperansao ya lleva para aqui na ciudad para uni otravez conel diila cada-y-cual familia. ā€“ Dan Toribio

Facebook Comments