3 diarrhea patients sa Sto.Tomas positibo sa COVID-19

16

Davao del Norte – Gibutyag sa Municipal Health Office (MHO) sa Sto.Tomas, Davao del Norte nga tulo (3) ka pasyente sa diarrhea sa Barangay Tulalian, ang nagpositibo sa Coronavirus Disease 2019 (COVID-19).

Sa interbyu sa DXDC RMN Davao kang Mart Sambalud, Municipal Information Officer sa Sto. Tomas, gibutyag niini nga gipailawom sa RT-PCR (reverse transcription-polymerase chain reaction) swab test, ang 99 ka diarrhea patients subay sa rekomendasyon sa Provincial Health Office (PHO) human nga pipila ka indibidwal ang naigo sa diarrhea apan walay sintomas sa dehydration.


Kagahapong adlawa (July 20, 2021) migawas ang resulta diin 3 sa 99 ang nagpositibo sa COVID-19 diin gilayon kining gi-isolate.

Samtang gipailawom usab ang 17 ka pasyente sa rectal swabbing og walo sa maong ihap ang nagpositibo sa cholera.

“Kadtong 99 patients RT-PCR ‘to sila, tulo (3) ang positive, isa (1) ang symptomatic, (2) duha ang asymptomatic, adults pero kadtong symptomatic is 20 years old ‘to siya,” sulti ni Sambalud.

Base sa July 20, 2021, anaa na sa 444 ang kinatibuk-ang kaso sa diarrhea sa lugar apan walay naka-admit sa hospital. Nagpahigayon na usab og chlorination sa ilang water source ang lokal nga gobyerno ug pagtunol og mainom nga tubig sa ilang mga residente.



Una nang nagdeklara ang diarrhea outbreak sa Sto.Tomas LGU ug misaka na usab sa tulo (3) ang namatay tungod sa maong balatian.

RadyoMaN Kirby Manzon


Facebook Comments