3 ka magbarkada nag-marijuana arestado

32
Davao City – Paglapas sa Republic Act 9165 ang atubangaon sa tulo ka mga batan-on human kini naaktohan nga adunay dalang marijuana sa Sitio Bolinao, Barangay Balutakay, Hagonoy, Davao del Sur alas 3:50 sa kaadlawon niadtong Lunes (Hulyo 25, 2022).

Sa interbyu sa DXDC RMN Davao kang Police Lieutenant Joselito Cortes, Office in Charge (OIC) sa Hagonoy Municipal Police Station (MPS), giila niini ang mga dinakpan nga mao sila Dean Mark Selgas, Denver Juanite ug Janzil Padillo, pulos taga Barangay Camanchilles, Matanao, Davao del Sur.

Saysay ni Cortes, gikan sa kalingawan ang magbarkada dayon nagpahigayon session sa iligal nga droga.

“Didto sa may baybay man ‘ni, sa may ngitngit. Suspicious man gud sya. Gisita sila sa tanod kay naay lighter nga nagapatay-sindi,” saysay sa pulis.

Nakuha sa posisyon sa mga dinakpan ang duha ka putos sa marijuana nga nagkantidad sa dul-anP8,000 ang street market value base sa Philippine Drugs Enforcement Agency (PDEA).

Plano usab nga magpyansa ang ilang pamilya karon nga semana.



Walay hunong ang pahimangno sa kapulisan sa publiko nga likayan ang iligal nga aktibidad ilabina ang iligal nga droga.

RadyoMaN Kirby Manzon

Facebook Comments