Misaka na sa 312 ka mga suspek sa kasong Corona Virus Disease o COVID-19 dinhi sa Cagayan de Oro.
Mao kini ang update report ni City Health Officer Dr. Lorraine Nery, sabay sa iyang pag-ingon nga kini nga record sukad gisugdan sa administrasyon ni Mayor Oscar Moreno ang kampanya batok sa covid-19 hangtod sa alas 10 ang takna sa gabi-e niadtong June 1.
Apan matud ni Nery nga gikan sa maong ihap, tulo lamang niini ang na-admit sa Hospital.
Ang tulo ka mga pasyente, gikuhaan nag swab test apan wala pay resulta hangtud sa pagsulat ning balita.
Gi-report usab ni Nery nga upat pa gihapon ang total probable cases sa covid-19 samtang nagpabiling 14 ang nagpositibo sa makamatay nga sakit dinhi sa Cagayan de Oro.
Sa pikas nga bahin, gibutyag ni Dr. Nery nga unom na ka mga tawo ang na-contact trace sa City Health Office sa Zone 9, Sityo Macanhan human nag-positibo sa Covid-19 ang 59 anyos nga babayeng maoy ika-14 ka mga Covid positive patients dinhi sa Cagayan de Oro.
-o0o-
