32 anyos nga persona ginluthang patay


Dumarao, Capiz – Patay ang 32 anyos nga persona matapos nga ginluthang kagab-i sa Barangay Calapawan, Dumarao, Capiz. Ginkilala ang biktima sa kay Delson Mamerto sang nasambit nga lugar.

Patal nga igo sa dughan ang naangkon ni Mamerto sang ginluthang sang suspek gamit ang wala pa napahayag nga kalibre sang armas luthang. Ginkilala ang suspek sa kay Joselito Sumadia sang Brgy Guinotos, Dumarao, Capiz.

Nagluntad ang insidente samtang nagapauli na ang biktima nga si Mamerto nagikan sa isa ka binayle. Ginbantayan sang suspek nga si Sumadia ang biktima kag gilayon nga ginluthang nga amo naman ang gintunaan sang iya kamatayon. 

Madasig nga nagpalagyo ang suspek sa wala nahibaluan nga lugar matapos nga ginkomiter ang krimen. Sa initial nga imbestigasyon sang Dumarao PNP nga antes pa man nagluntad ang pagpangluthang, may nagpatunga na nga indi pag-intindihanay sa tunga sang suspek kag biktima sa sulod sang binaylehan.

Facebook Comments