Roxas City, Capiz – Wala na sang kabuhi 34-anyos sang masapwan sang iya amay, matapos naghikog sa Sitio Iwahig, Barangay Banica, Roxas City. Ginkilala ang biktima kay Antonio Verundo, Jr., kag residente man sang nasambit nga lugar.
Base sa imbestigasyon sang Roxas City PNP, magkaupod pa nga nag-inom ang biktima kag ang iya amay upod sa ila nga mga abyan. Naglisensya ang biktima nga magasulod na ini sa iya nga kwarto,apang lipod sa ihibalo sang amay, ginabuko na sang biktima nga utason ang iya kabuhi.
Makaligad ang pila ka oras, nakibot na gid lamang ang amay sang biktima sang nakit-an nga nakabitay na ang iya anak gamit ang nylon nga pisi kag wala na sang kabuhi. Gindala pa sa ospital ang biktima apang gindeklarar sang doctor nga dead on arrival.
