388 ka scholars aprobado ni Gov. Uy, scholarship certificates gipanghatag na

32

Dipolog City- Nadawat na sa 388 ka mga bag-ong Provincial Youth Scholars alang sa school year 2018-2019 ang ilang Scholarship Certificates human gipahigayon ang orientation niadtong adlaw’ng Sabado, Agosto 25, sa Plenary Hall sa Zamboanga del Norte Convention and Exhibition Center ug niadtong Lunes, Agosto 27 didto sa Saint Joseph College Gym, Sindangan ning lalawigan.

Ang pagdawat sa mga sertipiko maoy timaan nga sila hingpit na nga scholars sa kagamhanang probinsiyal ilawom sa pagdumala ni Gov. Roberto Y. Uy diin ang edukasyon maoy 7th agendum niini.

Nahimugso ang Provincial Youth Scholarship Program (PYSP) sa probinsiya sa dihang nilingkod si Uy isip gobernador sa probinsiya tungod kay laraw niini nga tabangan ang kabus apan adunay katakus nga mga magtutungha sa kolehiyo.

Adunay duha ka kategoriya ang nasangpit nga programa, ang category A mao ang Bachelor’s Degree diin ang scholar maka-avail ug P10,000.00 samtang sa category B mao ang Technical Vocational Education nga P5,000.00.

Ang scholars gi-require nga mo-maintain ug 80% general weighted average sa category A samtang 75% sa category B.

Si Executive Assistant IV Praxides P. Rubia, kinsa maoy chairman sa screening committee maoy nangulo sa orientation diin gidasig niini ang mga scholars nga seryosohon ang ilang pagtuon tungod kay kini ang pagpangandam alang sa ilang kaugmaon.

Dugang tambag niini sa mga batan-on nga dili himuong rason ang kawad-on aron mo-undang sa pagtungha hinuon gam-on kining inspirasyon aron molampos.

Gihimong ehimplo sa Executive Assistant ang iyang kasinatian diin gisaysay niya ang iyang kaagi kon gi-unsa niya pagsugakod ang iyang pag-eskwela kaniadto nga wala pay mga scholarship programs ang gobyerno.

Wala usab kalimti ni Rubia ang pagpa-ambit sa pulong sa Ginoo isip spiritual guidance sa mga millennials.

Ang duration scholarship sa kagamhanang probinsiyal molungtad lamang ug usa ka tuig apan kini renewable kon ang estudyante maka-maintain sa rekisitos nga gisitar. (PIC-elds)

Facebook Comments