39 ka sunog sa Davao natala sa Abril 2021

30

Davao City – Moabot sa 39 ka mga insidente sa sunog ang natala sa Bureau of Fire Protection (BFP) sa syudad sa Davao sa bulan sa Abril nga maoy pinakadaghan kung itandi sa natalang sunog sa milabay’ng tulo ka bulan karong tuiga.

Sa interbyu sa DXDC RMN Davao kang Fire Supt. Alex Pamaybay, Davao City Fire Director, gibutyag niini nga sa maong ihap, 20 niini ang residential houses nga nasunog diin duha niini ang makonsiderang significant nga mao ang sunog sa Bankerohan ug ang pinakadako mao ang sunog sa Ilang, Bunawan District, Davao City niadtong Miyerkules (Abril 28, 2021).

Ang nahibiling ihap makonsiderang non-structural o kadtong grass on fire, vehicle on fire, ug uban pang ginagmay nga sunog.


Gibutyag usab ni Pamaybay, pipila usab ka ihap sa vehicular fire ang natala diin nag-unang problema niini ang kadaan o problema sa wirings o electrical problem sama usab sa nag-unang hinungdan sa sunog sa kabalayan.

Pahinumdum sa BFP official nga kanunay’ng susihon ang mga wirings labi na sa panimalay pinaagi sa electrical expert aron malikayan ang insidente sa sunog.

“Kadtong mga dugay na nga nagpuyo sa panimalay karon nga medyo nakalimtan nato’g pa-recheck ang atong mga electrical connections or wirings, ipatan-aw daw nato sa mga certified electricians para nga ma-check gyud siya kung tama ba ang load,” sulti ni Pamaybay.



RadyoMaN Kirby Manzon

Facebook Comments