Ya pwede privini el maga otoridad con el posible ataque bombardiada na ciudad este despues ya pwede sila aresta con el cuatro miembro del Abu Sayyaf Group na Manggal Drive, Baliwasan enantes aga.
El combinao fuerza del CIDG, Central Police Station, TFZ, NICA y otro agencia del gobierno ya sirbi search warrant na un boardinghouse na caso del possession de explosiva donde este ya resulta na aresto di canda; Aljiver Habibula, 35, Omar Julaspih, 22, Rody Marail, 36 y si Nash Amik, 32, todo maga nativo de Jolo, Sulu.
Ya pwede recobri na diila possession el un Improvised Explosive Device (IED) y otro pa maga material de bomba y el maga bala del calibre 5.56.
Asegun cuantos semana ya ta esta na lugar el maga ASG y ta actua estos suspechoso hasta por ultimo yan apply search warrant el maga miembro del CIDG con el ayuda tambien del barangay council del Baliwasan.
