Davao City – Kasong reckless imprudence resulting to homicide ang atubangon sa driver sa bus human niini nabanggaan-patay ang usa ka menor de edad nahitabo alas-8 sa buntag kagahapong adlawa (Pebrero 2, 2021) sa Sitio Kandingan, Brgy. Zone IV, Sta. Cruz, Davao del Sur.
Sa interbyu sa DXDC RMN Davao kang Police Master Sergeant Rodivico Taban, traffic investigator sa Sta. Cruz PNP, giila niini ang biktima nga si Aljay Alegato, 4-anyos, lalaki, taga Sitio Tungcaling, Barangay Sibulan, Sta. Cruz, Davao del Sur.
Samtang, ang driver sa bus nailang si Rey Gumban, 32-anyos, minyo, residente sa Lower Calinan, Banate, Malungon, Sarangani Province.
Saysay ni Taban nga subay sa giingon sa saksi sa insidente, kalit na lamang mitabok ang bata ug ulahi na kining nabantayan sa driver sa bus nga gikan sa syudad sa Davao rason nga nabanggaan kini og namatay.
“Nabangaan siya (ang bata) sa Mindanao Star Bus nga gikan sa Davao City padulong og Bansalan, Davao del Sur. According sa driver, wala niya nakita, didto na niya nakita nga duol na ang bata.. nabanggaan gyud siya,” saysay sa traffic investigator.
Hangtud sa pagsulat ning balita, wala pay ‘settlement’ nga nahitabo tali sa ginikanan sa bata ug sa driver sa bus.
Panawagan sa pulis sa publiko, kinahanglang mag-amping sa pagtabok sa dalan labi na sa highway, diin siguradohong walay sakyanan.
Samtang sa mga nagamaneho kun drivers, siguradohong dili kusog magpadagan labi na duol sa pedestrian lanes ug intersections.
RadyoMaN Kirby Manzon
