4 anyos nga batang lalaki naligsan

21

Davao City – Angol nga gidala sa balay-tambalanan ang usa ka kwatro anyos
nga batang lalaki sa dihang kalit kining mitabok sa dalan ug nabanggan sa
usa ka single nga motorsiklo.

Personal nga nagpablotter sa kapolisan sa Tugbok ang 57 anyos nga driver sa
motorsiklo nga si Nicas Evandelio Semacio, lumad, residente sa Purok 1
Barangay Manuel Guianga, Tugbok ning siyudad.

Sumala niini, bandang alas 8:30 sa kabuntagon padulong unta siya sa
sudlonong bahin sa Barangay Tagakpan Tugbok District sakay sa iyang
motoriklo.

Sa nahiabot siya sa may kanto sa nahisgotang barangay, adunay duha ka mga
bata nga gikan nagdula sa usa ka dakung kanal ug sa pagawas niini kalit nga
milabang sa dalan ang usa ka bata ug aksidenteng nabundulan sa motor rason
sa pagkapalid ug pagkaangkon og pipila ka bun-og ug pangos sa kalawasan.

Gilayon gipunit kini sa driver ug gidala sa pinakaduol nga balay-tambalan
ug padayon pang gina-obserbahan sa mga doktor.

Hinoon, luwas na ang 4 anyos nga batang lalaki sa kuyaw nga kahimtang.

RadyoMaN Paul Canono

Facebook Comments