4 barangay officials ha Region 8 nga apil ha narco-list han PDEA, ginlimpyo han PNP

TACLOBAN CITY – Ginlimyo han PNP an ngaran han upat nga opisyal han barangay dinhi ha Sinirangan Bisayas nga apil ha iginpagawas nga narco-list han Philippine Drug Enforcement Agency (PDEA).

Sumala han Police Regional Office 8, an upat nga opisyal han barangay in nagbag-o na matapos nga summurender han ira Oplan Tokhang.

Ini hira Domar Jabolin han barangay 3 Poblacion ngan Julie Rebato han barangay 2 Poblacion han San Jose de Buan, Samar; Ricky Ansale han barangay Matango, Almeria, Biliran; ngan hi Vladimir Adlawon, kapitan han barangay Kalanggaman ha Bato, Leyte.


Sumala kan PSINSP. Pirzano Camacho, Chief of Police han san Jose de Buan, Samar, gin-validate niya an narco list matapos nga ginsapubliko ini han PDEA.

Dugang ni Camacho, waray na bumalik ha buruhaton han illegal nga droga hira Jabolin ngan Rebato.

Sumala naman kan PSINSP. Arturo Salvacion Jr., Chief of Police han Bato, Leyte, diri na liwat nagamit hin illegal nga droga hi Adlawon tikang han summurender ini dida han tuig 2016..

Ginkompirma liwat ni PSINSP. Kim Wendell Montilla Chief of Police han Almeria Biliran nga diri na nagamit hin illegal nga droga hi Ansale dida liwat han summurender ini han tuig 2016.

Facebook Comments