General Santos City—Malampusong Narescue sa tropa sa Alabel PNP didto sa Iligan City ang 3 ka mga minor de edad ug usa ka hamtong nga pulos taga Barangay Kawas, Alabel, Sarangani Province kansa biktima sa illegal recruitment.
Sumala ni Police Sr. Inspector Benjie Ancheta, Chief Of Police sa Alabel Municipal Police Station nga una nang midangop sa ilang buhatan ang mga ginikanan sa 4 ka mga biktima human gidala sa Iligan ang ilang mga anak.
Nasayran nga usa ka Balong Alcantara maoy nagrecruit sa mga biktima aron unta mutrabaho dinhi sa Gensan isip katabang apan tua na hinuon sila gidala sa Iligan City. Ang mga biktima nag-edad ug 14, 16, 17 ug 23 anyos.
Pakyas usab ang PNP nga masikop ang illegal recruiter nga si Balong Alcantara human nakahering nga irescue ang mga biktima, mao nga iya kining gibyaan ug wala na masayran kung hain na nag tago-tago sa kasamtangan.
Gikumperma usab ni Police Senior Inspector Ancheta nga daan nang may standing warrant of arrest sa trafficking in person ang nasangpit nga suspek.
Dugay na matud pa kining gipangita sa ilang buhatan gumikan sa kasong iyang giatubang.Sa kasamtangan ginahikay na sa Alabel PNP ang laing kaso nga illegal trafficking in person batok sa nasangpit nga suspek.
