4 inmates patay, 3 pulis samdan sa ‘Oplan Greyhound’

132

Davao City – Nisangpot sa duguon nga insidente ang gikasang Joint Task Force Greyhound Operation sa PRO 11, BJMP 11, DCPO, RMFB 11, PDEA 11 ug CIDG 11 sulod sa Davao City Jail adlawng Sabado.

Matud sa opisyal nga report gikan sa Davao City Police Office nga gisugdan ang galugad kontra droga ug uban pang mga kontrabando sulod sa Davao City Jail bandang alas-3:00 sa kaadlawon.

Atol sa operasyon alas-10:30 sa buntag samtang gipagawas kada usa ang mga inmates sa Cell Number 18 sa BJMP ANNEX Building alang sa body search, cell search ug random drug test upat ka mga inmates ang wala matud pa nigawas sa selda ug usa kanila ang nipabuto gamit ang usa ka sumpak nga giila nga si Jerry Fernandez punterya ngadto sa usa sa mga pulis nga giila nga si Po3 Mark Anthony Cameros diin naigo kini sa iyang bulletproof vest.

Busa napugos og balos og pabuto ang nasangpit nga pulis ngadto sa maong inmate.

Inay mukooperar sa mga awtoridad ang laing tulo pa ka mga suspetsado nagpagula kini og mga bladed weapons ug giataki ang mga awtoridad ug didto na gipabuthan sa mga kapulisan ang mga suspek.

Samaran ang tulo ka mga pulis nga sila Po2 Jonie Dela Fuente, Po1 Ramon Rey Uyanguren ug Po1 Vincent Lomoljo.

Samtang gideklarang dead on arrival sa doktor ang upat ka mga piniriso sulod sa Southern Philippines Medical Center nga sila Alvin Celis, Dexter Delfino, Flor Leonard Restauro ug Jerry Fernandez.

Narekober sa Regional Crime Laboratory Office didto sa Cell #18 Annex A ang 10 ka cartridge sa 9mm, homemade firearm o sumpak duol sa lawas ni Fernandez ug tulo ka stainless knife duol usab sa mga lawas sa 3 ka laing mga inmates.

Musumada sa P154, 000 ka mga shabu, drug paraphernalias ug mga deadly weapons ang nasakmit atol usab sa nasangpit nga Oplan Greyhound.

Atol usab sa random drug testing nagpositibo ang Provincial Administrator sa BJMP Davao del Sur nga si Jail Chief Inspector Roman Hernandez ug laing siyam ka mga inmates.

Matud kang DCPO spokesperson Ma. Theresita Gaspan nga gikasa nila ang maong operasyon kini base sa ilahang nakuhang mga impormasyon gikan sa mga gipahigayong oplan galugad kaniadto nga adunay nalambigit nga mga personahe sa BJMP ug base usab sa ilahang mga buybust operation didto sa gawas Davao City Jail kaniadto.

Sa pikas bahin sa atong pakighinabi sa RMN Davao sa telepono sa tigpaba sa BJMP XI nga si Jail Insp. Edo Lobenia nidumili usa kini sa paghatag og komento sa insidente ug nagpadayon matud pa usab ang ilahang imbestigasyon.

RadyoMaN Aimee Guinita

Facebook Comments