4 private school employees sa Calinan arestado

35

Davao City – Arestado sa Calinan PNP ang upat ka mga empleyado sa usa ka pribadong eskwelahan sa Calinan, Davao City subay sa warrant of arrest nga gipagawas ni Regional Trial Court (RTC) Branch 1 Presiding Judge Kristine Basuga-Pague, kagahapong adlawa (Pebrero 23, 2021).

Sa interbyu sa DXDC RMN Davao kang Police Senior Master Sergeant (PSMS) Roger Nuñez sa Calinan PNP, gibutyag niini nga pasado alas-8 sa buntag gi-aresto ang nahisgutan tungod sa kasong Reckless Imprudence Resulted to Homicide diin gilayon usab silang naka pyansa kantidad P30,000 matag usa alang sa ilang temporaryong kagawasan.


“Reckless Imprudence Resulted to Homicide (ang ilang kaso). Nideretso ra ni sila’g bail bond. Mura’g P30,000 (ang kantidad), ang naka kuan didto sa korte,” segun ni Nuñez.

Kahinumduman nga ang kaso nagsumikad sa pagkasunog-patay sa usa ka 12-anyos nga Grade 7 student sa maong eskwelahan niadtong Oktubre 25, 2019 human aksidenteng nasunog sa kandila ang iyang costume alang sa ilang intramural activity.

Nadala pa sa Southern Philippines Medical Center (SPMC) ang biktima apan didto na kini nakabsan sa iyang kinabuhi.

Gilayon usab nga gisinggit sa pamilya ang hustisya aron mapanubag ang mga responsable tungod sa maong insidente.




RadyoMaN Kirby Manzon

Facebook Comments