Detinado karon sa mini-cell sa Gitagum Municipal Police Station ang 49 anyos nga si Barangay Matangad Kagawad Dario Loretche, human kini masikop sa hiniusang pwersa sa mga otoridad.
Nasikop si Loretche sa Purok 6, Brgy. Matangad, Gitagum, Mis. Or., niadtong Sabado sa buntag atol sa gipahigayong buy bust operation.
Tungod niini, gisilbi gilayon sa Gitagum Municipal Police Station nga giunhan ni Police Senior Insp. Joan Galvez ang search warrant batok sa maong kagawad, kauban ang Provincial Intelligence Branch nga giunhan ni Police Chief Insp. Esperidion Viado kauban ang mga ginsakpan sa Provincial Drug Enforcement Unit ug Regional Drug Enforcement Unit nga giunhan ni Police Senior Insp. James Batastas ug sa Philippine Drug Enforcement Agency Misamis Oriental.
Kini human gikonsiderar si Loretche nga usa ka high value target ug anaa sa ikapito sa listahan sa drug watchlist.
Samtang……
Nakuha sa posisyon sa maong opisyal ang usa ka sachet sa gituohang shabu nga napalit sa ilang gipatuong buyer, mga illegal drug paraphernalia ug cash nga moabot sa kapin 1 tawsan pesos.
Pahayag sa kapolisan nga grabe ang ilang gihimong monitoring ug beripikasyon batok sa maong kagawad, aron lamang kini masikop.
Gumikan niini, kasong pagsupak sa Republic Act 9165 kon Dangerous Drugs Act ang giatubang nga kaso sa maong kagawad.
