Roxas City, Capiz – Kapin sa 56 ka mga katapo sang kapulisan sa Capiz ang magapaidalom sa 35 ka adlaw nga Criminal Investigation Course.
Ang CIC Class 529-2017 ang official nga ginkumpirmar sa ginpatigayon nga opening ceremony sa Capiz Police Provincial Office, Transformation Hall sang nakaligad nga Oktubre 9 sini nga tuig.
Katuyoan sang pagpaidalom sa mga ini sa Criminal Investigation Course amo nga mas labi pa nga mahanas kag mapasangkad ang ihibalo sa husto nga pag-imbestigar.
Samtang ginpangunahan naman ni CPPO Provincial Director Police Senior Supt. Samuel Nacion ang amo nga seremonya.
Sa iya mensahe, ginsiling ni Nacion nga kinahanglan nga seryosohon sang mga ini ang amo nga kurso bangud indi tanan nga mga katapo sang kapulisan sa Capiz ang nahatagan sang amu nga higayon nga ipaidalom sa investigation course.
Ini ang kabahin lamang sa inisyatibo ni PNP Regional Director PC/SUPT Cesar Hawthorne Binag nga mahanas ang madamo nga kapulisan sa patag sang criminal investigation.
(c)- Capiz PPO PCR
