Lake Sebu, South Cotabato–Mukabat na sa 57 ka mga pamilya ang apektado sa gipahigayong zonal lockdown sa LGU- Lake Sebu kung asa nagagikan ang duha ka mga pasyente nga nagpositibo sa COVID-19.
Unang gikumpirma ni Lake Sebu Municipal Health Officer Dr. Jocelyn Bayquin nga nakahatag na ug ayuda ang local government unit sa Lake Sebu sa mga pamilya sa duha ka mga sitio nga apektado sa gipatuman nga zonal lockdown.
Samtang tungod sa problema sa supply sa tubig sa lugar nagpadala na usab ang panggamhanan sa South Cotabato ug tabang pinaagi sa PDRRMO ug nagdugang usab ang LGU sa Lake Sebu. Magadepende usab sa ilang mamahimong assessment kung kanus-a hingpit nga tanggalon ang zonal lockdown sa nasangpit nga lugar.
Kalabot niini, nahuman na ang case finding ug na- isolate na ang mga may simtomas nga close contacts ug gipailawom na sa swab test alang sa RT-PCR ug anaa na sa mga quarantine/isolation facilities sa lungsod. Ang mga asymptomatic contacts ang gipailawom na usab sa RDT ug nakaquarantine na sa karon. Ilang hangyo sa katawhan nga sabton sila sa mga gihimong mga regulasyon aron nga mapugngan ang pagkatag sa virus sa lugar.
