6.5 Billion Pesos nga proposed budget sa syudad, wala pa maaprobahi sa 18th Council

Reenacted ang posibling gamiton ni Cagayan de Oro City Mayor Oscar Moreno nga budget sa ilang operation sa city hall sa Enero 1, 2019.

Kini kay pakyas ang 18th Council sa pag-approve ning bulan sa Disyembre sa 2019 proposed Budget ni Mayor Moreno nga mokabat sa 6.5 billion pesos.

Matud ni Councilor George Goking, Chairman sa Committee on Ways and Means ug Committee on Trade and Commerce nga si Mayor Moreno mogamit sa reenacted budget sugod sa Enero uno hangtud nga ilang ma-approve sa city council sa sunod tuig ang proposed budget sa mayor.


Wala isulti ni Goking kon kanus-ang pitsaha o unsang bulana sa sunod tuig ilang aprobahan ang budget ni Mayor Moreno.

Apan iyang gipasabot nga sa Enero siyete mobalik ang ilang session sa City council.

Matud ni Goking nga wala pa ma-aprobahan sa city council ang proposed budget ni Moreno kay niadto pang Disyembre 17 ilang gi-aprobahan sa city council ang Annual Investment Plan kon AIP sa city hall.

Ang Annual Investment Plan maoy usa sa mga requirements sa Department of Budget and Management sa  dili pa aprobahan sa mga legislator ang annual budget.

“Dili man mahimo nga among dunganon sulod sa usa ka bulan ang pag-approve sa AIP ug ang proposed budget, ang AIP among gi-aprobahan niadto pang December 17” matud ni Goking.

Matud ni Goking nga nalangan sila sa City council pag-approve sa AIP sa city hall  alang sa 2019 kay ilang gitun-an pag-ayo ang nasangpit nga Annual Investment Plan.

Facebook Comments