6 -anyos nga bata gikulata sa inahan hangtod nga namatay,mama gipasakaan na og Parricide

*Nag-atubang og kasong Parricide ang usa ka inahan nga taga-lungsod sa San Remigio human matod pa, napatay niini ang iyang kaugalingong anak pinaagi sa pagpangulata.*

* Matod sa inahan, dili niya intensiyon nga patyon ang bata apan nahinaykan niya kini human nga nagmagahi pag-inum sa iyang tambal sa hilanat.*

*Ang San Remigio Police nisang-at sa reklamong parricide batok sa 30-anyos nga inahan nga si Felma Cabataña human matod pa napatay niya sa pagpamun-og ang iyang 6-anyos nga anak lalaki nga si Kent Joseph del Rosario.*


*Nahitabo ang giingong pagpanagmal niadtong Disyembre 27, 2018 sa brgy. Manyo Yolanda sa San Remigio, diin gisuwayan unta pagpa-inom sa inahan ug tambal sa hilanat ang iyang anak apan dihang nagdumili kini, nahinaykan gyud niya kini.*

*Nakahinumdom pa si Cabataña nga nadagmalan niya ang nawong, ang tiyan ug bitiis sa bata apan giklaro niya nga wala siya’y intensiyon nga patyon kini.*

*Human sa pagpanagmal ug pagdumili gyud sa bata pag-inum ug tambal, gisuwayan kini pagdala sa tambalanan sa Bogo City apan wala pa gani makaabot sa dapit, nakahukom ang inahan nga adto na lang kini dalhon sa mananambal kay matod pa, posibleng gihilo-an ang iyang anak.*

*Disyembre 26 dihang kalit nga gihilantan ang bata apan matod sa inahan, maayo pa ang kondisyon niini nianang pagka petsa 25 ug nakatambong pa kini ug Christmas party. Disyembre 30 na hingpit nga nabugtu-an sa iyang kinabuhi ang bata.*

*Matod sa imbestigador sa San Remigio Police Station PO3 Joe Johnneski Inot, gibarugan sa inahan sa pagsukit-sukit sa tinugyanan sa punerarya nga hilanat maoy hinungdan sa kamatayon sa iyang anak.*

*Apan tungod sa pagduda, ang taga-punerarya nitaho ngadto sa kapulisan labot sa kahimtang sa bata nga grabe ang bun-og dihang nadangat sa ilang buhatan.*

*Wala pa ma-release ang death certificate sa bata apan sigun ni Inot, daghang bun-og ang nakit-an dihang gipaubos sa medico-legal examination ang bata. Sa Enero 6, gitakda nga ipaubos sa auytopsy angs patayng lawas niini aron mas mahibaw-an ang tinuoray nga hinungdan sa iyang kamatayon.*

*Ang bata mag-7 anyos na unta karong Pebrero 22. Ang amahan niini nga si Glenn del Rosario, nga kapuyo kaniadto ni Cabataña, maoy direktang reklamante sa kaso.*

*Wa magdahum si Glenn nga human sa 4 ka tuig nga wala na niya igkita ang iyang anak, diha na niya kini ikahimamat sa haya sa bata.*

Facebook Comments