69-anyos nga mag-uuma gipusil sa lungsod sa Midsalip, patay

Midsalip, Zamboanga del Sur – Patay ang 69-anyos nga mag-uuma human gipusil sa wala mailang mamumuno didto mismo sa sulod sa iyang pinuy-anan sa Purok Nangka, Brgy. Timbaboy, Midsalip, Zamboanga del Sur alas 8:10 kagabie, November 17, 2021.
Naila ang biktima nga si Danilo Balbastro, residente sa nasangpit nga dapit.
Nahagba na sa salog ug wala nay kinabuhi dihang naabtan sa Midsalip PNP ang biktima.
Sa inisyal nga imbestigasyon sa kapulisan, anaa lang sa ilang pinuy-anan ang biktima uban ang iyang asawa ug apo diin human sa ilang panihapon nilingkod ang biktima sa ilang sala aron pagtan-aw og salida sa telebisyon dihang kalit nga dunay nanuktok sa pultahan sa makatulo nga higayon.
Gidid-an sa asawa ang bana nga ablihan ang pultahan apan nagkuha kinig kutsilyo ang biktima dayon abli sa pultahan.
Gumikan sa pag-abli sa biktima sa pultahan sa maong balay nakalugar ang suspek sa pagpusil sa biktima nga niigo sa wala nga aping nga nilahos sa luyo nga bahin sa ulo nga gikamatay niini.
Padayon pa nga galusad og hot pursuit operation ang PNP Midsalip aron mapanubag ang resposable.

Facebook Comments