Davao City – Angol ang usa ka menor de edad atol sa nahitabong road accident sa may Davao Bukidnon National Highway Purok 2-A Barangay Riverside Calinan, Davao City.
Base sa rekord sa Police Regional Office- XI (PRO-XI), padulong og Davao Bukidnon Highway si Liborio Astorga Colarte Jr, 58 anyos, minyo ug nakapuyo sa Purok 2-A Barangay Riverside, Calinan Davao City samtang nagmaneho sa usa ka Mitsubishi Pajero.
Matod pa, samtang ang behikulo anaa na dapit sa gitindugan sa batang babae uban ang iyang inahan nga si Namely Lawas Escal, kalit natanggal ang wala nga ligid sa sakyanan nga gimaneho ni Colarte.
Gisulayan pa og bira sa inahan ang iyang anak sa dihang nakit-an niya ang maong ligid nga padulong kanila apan napakyas niya kini og salbar sa nag lupad nga ligid gikan sa maong behikulo.
Tungod sa kakusog sa impact nakahiagom og samad ang maong biktima ug daling gidala sa balay tambalanan.
Ang driver ug ang behikulo niini anaa na sa Calinan Police Station alang sa dugang imbestigasyon.
RadyoMaN Abi Bibera
