7-anyos patay, ginikanan ‘injured’ sa sunog sa Lupon, DavOr

26

Davao City – Patay ang 7-anyos nga babae sa nahitabong sunog sa Purok Sampaguita, Barangay Don Mariano Marcos, Lupon, Davao Oriental alas-2:20 kagahapon sa kaadlawon (Pebrero 26, 2021) nga gilayong girespondehan sa Mati Bureau of Fire Protection (BFP) nga maoy mas duol sa lugar.

Sa interbyu sa DXDC RMN Davao kang Police Staff Sergeant (PSSg) April Rose Hallazgo, duty investigator sa Lupon Municipal Police Station (MPS), gibutyag niini nga patay ang menor de edad nga si Xian Lee Regomeo samtang injured ang ginikanan niini nga si Antonio Regomeo, 66-anyos, Lydia Regomeo, 61-anyos.


“Actually, belong siya sa Lupon, under siya sa Lupon. Didto siya agion sa Mati. Layo-layo pud siya. Siguro nag (dako na ang kalayo) unya dugay sila nakagawas sa ilang balay,” segun ni Hallazgo.

Matud sa duty investigator, nagsugod ang sunog sa balay sa pamilyang Regomeo partikular na sa kwarto sa amahan sa biktima, diin subay sa imbestigasyon, nag overheat nga gi-charge nga cellphone ang hinungdan niini.

Naugdaw usab ang laing upat pa ka balay diin sa kinatibuk-an, anaa sa 7 ka pamilya o anaa sa 19 ka indibidwal ang apektado sa sunog samtang, sa datos sa BFP, kapin kun kulang P250,000 ang damyos sa maong insidente.

RadyoMaN Kirby Manzon



Facebook Comments