ZAMBOANGA CITY—Despues el confiscacion del mas de 15 saco de colorato y otro maga material ta hace bomba na Arena Blanco del Domingo, otro 20 kilo ya tambien de colorato y maga improvised denamita ya puede recobri el maga pulis durante el aresto del siete persona na un operacion na Sitio Bugok, Kasanyangan antede man medianoche del Lunes.
El portavoz del PRO9 si Chief Insp. Helen Galvez ya habla el se que llama buy-bust operation ya conduci el maga pulis del Tetuan Police Station na encabesamiento de Supt. Nonito Asdai y Sr. Insp. Alrashid Tulawie del 901st MARSTA hunto con PO2 Chanlier Asdai banda alas 11 donde este ya resulta el aresto de canda; Garry Jarani y Maimbong, 21, Abdusali Jarani y Maimbong, 59, Balli Sansarani, 50, Munsol Bara, 19, Alijon Maimbong y Ambila, 45 y Tando Tanoh y Maulati, 48, todo maga native de Maluso, Basilan.
Maga pulis ya puede recobri desde canila amo el P150 marked money, 9 improvised blasting cap, 7 time fuse, un baso-baso ta usa para midi colorato, 7 maga denamita y 20 kilo de colorato.
Conel maga suspechao ya lleva na Tetuan Police Station mientras el maga explosiva y colorato ya entrega na bomb squad. – Dan Toribio
