Davao City – Pipila ka mga botante sa Brgy. Tanglaw, Dujali, Davao del Norte ang nagkakomosyon tungod sa alegasyong adunay mga nangabot nga flying voters sa nasangpit nga lugar.
Sa interview sa DXDC RMN Davao sa usa sa mga residente sa Brgy. Tanglaw nga si Josie Baracilla, adunay mga nangabot matud pa sa ilang lugar nga mga botante nga dili taga Dujali.
Dugang ni Baracilla nga nagkaproblema usab sila tungod wala ang mga pangalan sa Posted Computerized Voters’ List (PCVL) sa mga mga botante nga narehistro sa Dujali hinungdan nga giharangan nila ang ubang mga botante nga matud pa taga Mati, Panabo, Carmen ug ubang mga kasikbit nga lugar tungod sa alegasyong pagpanikas sa eleksyon.
Samtang giklaro ni Gerlie Iluis, Election Officer sa Tanglaw nga nagahatag sila og notification ngadto sa usa ka political party aron mu-attend sa convening of the board kung aduna silay ipasang-at nga pag-object sa usa ka aplikante.
“But then wala man pod gud na sila naga-appear so kami sa election registration board thinking nga walay objection sa ila kay kami mismo wala kabalo kay ministerial among duty,” segun niini.
Gani sumala ni Iluis nga dili na karon ang tamang panahon aron mureklamo gumikan sa ngalan naka lista na ang usa ka botante, lehitimo kini.
RadyoMaN Renz Barbarona/Jason Amisola
