Tapaz, Capiz – Arestado ang 33- anyos nga persona sa ginkasa nga buy bust operation sa Poblacion, Tapaz, Capiz.
Ginkilala ang subject person kay REY DELFIN y SEINZ, residente sang Barangay San Julian, Tapaz, Capiz kun sa diin narekober sa iya ang lima(5) ka sachet sang suspected shabu kag isa ka unit sang cellphone.
Maluwas diri, narekober man sa iya ang P2, 100 pesos nga buybust money kun sa diin 100 pesos ang subscribed marked money samtang P2,000 ang boodle money.
Ginabanta nga nagabug-at sa lima(5) ka gramos ang narekober nga druga nga may Standard Drug Price nga nagalab-ot sa P34, 000 pesos.
Suno sa impormasyon, isa ka AWOL member sang Philippine Army ang amo nga persona kag ginakabig high value target individual.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang nasambitan nga persona.
Natigayon ang amo nga operasyon paagi sa ginhugpong nga pwersa sang Cluster Station Drug Enforcement Team(SDET) sang Tapaz MPS kag Dumalag MPS, Provincial Drug Enforcement Unit(PDEU) kaupod ang PDEA 6.
