Aca tres dia

Na aca tres dia del implementacion na ciudad el Enhanced Community Quarantine ta aparese que nohay pesao problema ta enfrenta el maga enforcers amediante que ta obedese el publico con el mandato del govierno.
Hunto el diferentes officiales del maga barangay con el pulis y military ta trabaha para asegura que nohay quien atribi viola con este.
Pero desde el primer dia del implementacion, tiene siempre cuantos el quien ta precura man lusut na maga checkpoint donde ta tene que man issue canila ticket el maga pulis especialmente con aquelios quien ta hace imbusterias con el maga otoridad na checkpoint.
Ehemplo na Culianan Police Station tiene del cuantos motorista el ta reclama que asegun ta cuji canila el maga pulis amediante ta manda permiti el govierno man ancas na motorsiclo si anda compra comida o medicina.
Ya explica el hefe del Culianan Police Station si Major Chester Natividad ta confisca sila lisencia solamente de aquelios quien ta precura hace embusterias canila para puede lang sale afuera del casa muntando na motorsiclo.
Asegun con Natividad bisto con aquelios ta habla mentira y aquelios ta habla el verdad.
Poreso apelo di Natividad mejos si esta ya lang na casa si nohay man onde anda emporatante.
Na initial assessment tambien policia local ta aparese enbuenamente el implementacion del enhanced community quarantine na ciudad y controlao el situacion el pulis y military junto con el diferentes barangay officiales na entero ciudad.