RMN Laoag – Nakellaat dagiti umili ti Sarrat gapu iti agwarwaras a damag a maipagarup a naghudas ti maysa a politiko iti grupo ti agdama a Mayor Remigio Medrano.
Ti ar-aramaten ti grupoda ket ti agdama a konsehal Andres Rustico Agno. Rumrumuar a nailaksid isuna iti grupo gapu ta sabali ti kaduana ken kasta pay saan nga aktibo iti grupoda.
Inlawlawag met ni Mayor Medrano a saan nga inlaksid ti grupo ni Agno, nu di ket ti konsehal ti immadayo iti dati a grupona.
Iti met biang ti konsehal, kinunana nga awan inaramidna a madi nu diket adda laeng nakadkaduana a gayyemna, a daytoy ket manipud iti sabali a partido.
Kabayatanna, nagpalagip ti Commission on Elections (COMELEC) a masapul a nakapia ken natalna iti panangisayangkat iti kampanya iti anyaman a grupo wenno partido tapno maliklikan ti riribok ken makadangran iti pada a tao.
Bernard Ver, RMN News
