Dumarao, Capiz- Patay ang isa ka lalaki matapos nabungguan sang truck ang ginamaneho sini nga motorsiklo sa Barangay Poblacion Ilawod, Dumarao, Capiz kahapon sang hapon.
Ginkilala ang biktima kay Wilfredo Pasig y Balaran, 50 anyos kag residente sang San Enrique, Iloilo. Ang driver sang truck ginkilala naman sa kay Edmundo Santarita y Bagtong, 40 anyos, residente sang Dingle, Iloilo.
Nagluntad ang insidente samtang ginasubay ni Santarita ang dalan sa nasambit nga lugar, hinali na lamang nga nag-ulhot sa iya unahan ang motorsiklo nga ginamaneho sang biktima
Nahibaluan nga nag-overtake sa natuo nga bahin sang truck ang motorsiklo nga nangin rasun sang pagkabunggo sang truck sa motorsiklo sang biktima.
Nag-angkon sang samad sa ulo kag tiyan ang biktima nga amo ang gintunaan sang iya kamatayon.
Gindala pa sa Dao District Hospital ang biktima apang gindeklarar nga dead-on-arrival sang attending physician.
Boluntaryo naman nga nagsungka sa Dumarao PNP si Santarita, apang ginpaguwa man ini matapos magkasugot ang magtimbang nga pamilya.
(Photo from Bfp Dumarao)
