Roxas City, Capiz – Pilason ang isa ka persona matapos nagbaliskad ang ginasakyan sini nga motorsiklo pasado alas 9 sang gab-e malapit sa stasyon sang dyVR sa Brgy Punta Tabuc, Roxas City.
Ginkilala ang biktima kay Raffy Alcones, 30-anyos ang pang-edaron kag residente sang Sitio San Juan, Brgy Baybay sining syudad.
Ini ang nag-angkon sang mga gasgas kag pilas sa nagkatuhay nga parte sang iya lawas.
Ginapatihan nga wala makontrol sang nasambitan nga biktima ang manibela sang ginadala nga motorsiklo kabangdanan ini ang natumba.
Naobserbahan nga hubog ang amo nga persona.
Madasig naman nga nagresponde ang mga katapo sang Capiz Emergency Response Team(CERT) kag gindala sa pinakamalapit nga ospital ang nasambitan nga biktima agud madapatan sang nagakaigo nga pagbulong.
