Aktibo nga kaso sang COVID-19 sa Brgy. Sta. Cruz, Koronadal City padayon ang pagsaka.

7

Padayon ang pagsaka sang kaso sang COVID-19 sa Barangay Sta. Cruz, suno kay Kapitana Ninfa Tumilap tungod base sa datos sang Mayo 4, naglab-ot na sa 60 ang aktibo nga kaso sa barangay.
Ang Brgy. Sta. Cruz ang nagapanguna sa 27 ka mga barangay sa syudad sang Koronadal nga may mataas nga kaso sang COVID-19 sa subong.
May-angot sini, suno kay Kapitana Tumilap hugot nila nga ginapatuman ang implementasyon sang Modified Enhanced Community Quarantine base sa ginpapanaug nga Executive order ni Koronadal City Mayor Eliordo Ogena.
Aminado man ang opisyal nga sa una kag ikaduha nga adlaw sang implementasyon sang MECQ sa barangay madamo ang nangin pasaway nga residente sini amo nga nagpangayo siya sang augmentation sa Kabalikat, PNP kag City traffic apang sa subong nagasunod naman suno pa ang mga pumuluyo sa polisiya.
Nagalaum naman si Kapitana Tumilap nga magnubo ang kaso sang COVID-19 sa barangay paagi sa implementasyon sang MECQ kag kooperasyon sang mga residente.
Apela niya naman sa mga residente sang Brgy. Sta. Cruz nga magkooperar sa ginapatuman nga polisiya kag i-implementar ang minimum health standard kapareho sang pagsuksok sang facemask/faceshield, social distancing, handwashing kag iban pa.
Sa datos sang Mayo 4, 2021 naglab-ot na sa 205 ang aktibo nga kaso sang COVID-19 sa Koronadal City.

Facebook Comments