Alleged travel and tours scam sa Bacolod; isa sa mga biktima may masobra 30 mil pesos pa nga sulukton sa operator

16

BACOLOD CITY- Isa sa mga biktima sang gina-alegar travel and tour scam sa Bacolod ang may P37,000 pa nga sulukton sa operator sang LJAT Travel and Tours.

Na-interview sang DYHB si Christine Franco, isa sa pito ka mga nagpasaka na sang reklamo sa NBI Bacolod batok sa operator sang LJAT Travel and Tours nga si Lecile Jane Aurelio Tenerife. Ginsaysay sa DYHB ni Franco, June 2019 sang nagpa-book siya LJAT Travel and Tours para sa trip sa Bali, Indonesia kag Hong Kong. Suno diri, naganyat siya sa offer sang nasambit nga operator bangod sa promo nga 1 plus 1 ukon isa lang ang bayaran kag libre na ang isa ka kliyente.


Naka-schedule kuntani ang trip ni Franco sang April 20, 2020 upod ang iya iloy kag duha niya ka kabataan apang wala na nadayon bangod sang COVID-19 pandemic. Nagpa-refund na lang si Franco apang ang ginbalik lang sa iya ni Tenerife ang bayad nila sa Bali trip kag may bilin pa ini nga sulukton nga P37,000. Suno pa kay Franco, wala na nagapakita sa iya sa Tenerife kag nagapangakig pa ini kun sukton.

Ginatinguhaan naman sang DYHB nga makuha ang bahin ni Tenerife angot sa mga alegasyon apang sang nagpadulong ang News Team sa ila nga balay, wala sang nag-atubang. Apang nakapadala na sang text message mismo si Tenerife sa DYHB News Team kag nagapamangkot kon san-o siya makasabat sa mga alegasyon. Sa ulihi nga impormasyon nga nakuha sang DYHB News Team, wala na sa ciudad sang Bacolod si Tenerife.

[image: image.png]

Facebook Comments