Anay Barangay Kagawad ginluthang patay sang armado nga mga tawo sa syudad sang Escalante

Patay ang isa ka former barangay kagawad sang ginluthang sang wala pa nakilal-an nga mga suspek sa Brgy. Malasibog, Escalante City, las-7:00 sang gab-i, Oktubre 22.

Ginkilala ang biktima kay Ernesto Valiente , 60-anyos. Sa interview sang DYHB sa hepe sang Escalante City Police Station nga si Police Major Gil John Despe, nagalakat ang biktima kagab-i halin sa iya furniture shop sang ini ang ginluthang sang mga suspek nga nagasakay sa pick-up.

Nakaangkun sang pilas sa ulo kag iban nga parte sa lawas ang biktima matapos ginluthang gamit ang 45 caliber pistol. Si Valiente ang ikatatlo na nga biktima sang asod-asod nga pagpangluthang sa Escalante sa nakaligad nga sinimana.


Madumduman nga sadtong Oktubre 10, ginluthang man samtang yara sa sulod sang iya balay ang driver sang patrol car sang Escalante CPS nga si Arjie Bautista, 33-anyos sa Sitio Bautista, Brgy. Malasibog kag nagligad nga Oktubre 20, ginluthang man sang wala nakilal-an nga mga suspek sa Sitio Sambulong 1, Brgy. Paitan ang traffic enforcer nga si Julieto Limbaga, 45, samtang ini ang sakay sang iya motorsiklo.

[image: image.png]

Facebook Comments