‘Anti-Profanity Ordinance’ gidebatehan

11

Davao City – Alang sa ubang tawo, dili makumpleto ang pulong kung walay pagpamalikas diin nahimo nang kabahin sa batasan sa uban nga kung magdiskurso dunay sagol istoryang maut paminawon labaw na kun masuko.

Gani mahimong sadya ang panagtapok sa maghigala kung sa kinumidyahanay dunay sambog pamalikas ang mga pinulongan nga daw bale-wala lang sa uban bisan og gisabonan na og balikas sa mga kaberks.

Matud sa kanhi University of Mindanao (UM) Professor ug karon Mindanao Development Authority (MinDA) Spokesperson Dr. Adrian Tamayo nga dili sukaranan ang balikas ug pagsulti og maut nga pulong sa batasan sa usa ka tawo.

Ug dili puwede but-an kun punggan ang tawo sa iyang gusto nga istilo sa matang ug paggamit og pulong hilabi na kun mao na kini ang naandan sa sulod ug gawas sa balay.

Ug labaw nang dili did-an ug silotan ang matag indibidwal nga makabutyag og maut nga pulong hilabi na kun mao na kini ang unod sa tagsa-tagsa ka gibati.

Kumento ni Tamayo sa bag-ong ordinansa sa Baguio City kung asa hugot nang i-ban sa maong siyudad ang pagpamalikas mao nga sobra ra pod kaayo kay sama rang gipatay ang kagawasan ug naandan sa uban.

Ug kung aduna may pakusgan kana dili ang pagsilot apan kanang dasigon ang matag pamilya nga likayan ang mga pamalikas sulod sa panimay aron dili madala sa pag-abot sa publiko ug paghalubilo sa uban.

Gidepensahan ni Tamayo ang mga pagpamalikas ni Pres. Rodrigo Duterte matag higayon aduna kini diskurso sa publiko sanglit naandan naman kini sa pamuno-nasud.

RadyoMaN Joel Viray

Facebook Comments