Davao City – Naamgohan karon ni Third District Councilor Joselle Villafuerte nga adunay igong katarongan si Mayor Sara Duterte-Carpio sa pagkanselar sa mga dagkung aktibidades sa 83rd Araw ng Dabaw nga mahitabo unta karong March.
Segun ni Councilor Joselle Villafuerte, nanukad ang lakang sa mayor gikan sa mga impormasyon nga gipaabot sa Department of Health (DOH) mahitungod sa gi-atubang nga hulga sa syudad sa Davao diha sa 2019 novel coronavirus nga kung dili mag-kanselar og mga kalihukan ang syudad sa Araw ng Davao, may dakung posibilidad nga makasulod dinhi sa dakbayan ang gikahadlokang virus.
Sanglit ang gihunahuna sa presidential daughter mao man ang kaluwasan sa mga Davaoeños, gideklara ang kanselasyon sa mga aktibidades sa 83rd Araw ng Dabaw diin angay kining suportahan ug uyonan sa kadaghanan, matud ni Villafuerte.
Gipaboran usab sa konsehala ang kamanduan sa alkalde nga temporaryo unang did-an ang mga kabanay nga maghatud- sundo sa ilang mga pasahero sa mga airport, pantalan ug sa mga terminal ug uban pang transportation hubs aron malikayan ang pagkuyanap o pagtakboy sa virus dinhi.
Husto usab ang dugang direktiba sa mayor nga ipatuman ang price freeze sa tanang produkto sama pananglit sa mga face masks aron dili makapahimulos ang mga negosyante sa pagpasaka sa presyo niini ingon man kadtong ubang mga magpapatigayon kinsa mag-hoard kun magtipig og goods and supplies, panapos ni Villafuerte.
RadyoMan Joel Viray
